ອີງຕາມສື່ມວນຊົນຕ່າງປະເທດ, ສະຫະລັດອາເມລິກາ ແລະ ຍີ່ປຸ່ນ ໄດ້ບັນລຸຂໍ້ຕົກລົງເພື່ອຍົກເລີກພາສີເພີ່ມເຕີມບາງຢ່າງຕໍ່ການນຳເຂົ້າເຫຼັກກ້າ. ມີລາຍງານວ່າຂໍ້ຕົກລົງດັ່ງກ່າວຈະມີຜົນບັງຄັບໃຊ້ໃນວັນທີ 1 ເມສາ.
ອີງຕາມຂໍ້ຕົກລົງດັ່ງກ່າວ, ສະຫະລັດອາເມລິກາຈະຢຸດການເກັບພາສີເພີ່ມເຕີມ 25% ສຳລັບຜະລິດຕະພັນເຫຼັກກ້າຈຳນວນໜຶ່ງທີ່ນຳເຂົ້າຈາກຍີ່ປຸ່ນ, ແລະ ຂີດຈຳກັດສູງສຸດຂອງການນຳເຂົ້າເຫຼັກກ້າທີ່ບໍ່ຕ້ອງເສຍພາສີແມ່ນ 1.25 ລ້ານໂຕນ. ໃນທາງກັບກັນ, ຍີ່ປຸ່ນຕ້ອງໃຊ້ມາດຕະການທີ່ມີປະສິດທິພາບເພື່ອສະໜັບສະໜູນສະຫະລັດອາເມລິກາໃນການສ້າງ “ຕະຫຼາດເຫຼັກກ້າທີ່ຍຸດຕິທຳຫຼາຍຂຶ້ນ” ໃນຫົກເດືອນຂ້າງໜ້າ.
ທ່ານ Vishnu Varathan ນັກເສດຖະສາດອາວຸໂສ ແລະ ຫົວໜ້າຍຸດທະສາດເສດຖະກິດຂອງທະນາຄານ Mizuho ໃນສິງກະໂປ ກ່າວວ່າ ການຍົກເລີກນະໂຍບາຍພາສີໃນລະຫວ່າງການບໍລິຫານຂອງທ່ານ Trump ແມ່ນສອດຄ່ອງກັບຄວາມຄາດຫວັງຂອງລັດຖະບານ Biden ໃນການປັບປຸງພູມິສາດການເມືອງ ແລະ ພັນທະມິດການຄ້າທົ່ວໂລກ. ຂໍ້ຕົກລົງພາສີສະບັບໃໝ່ລະຫວ່າງສະຫະລັດ ແລະ ຍີ່ປຸ່ນຈະບໍ່ມີຜົນກະທົບຫຼາຍຕໍ່ປະເທດອື່ນໆ. ໃນຄວາມເປັນຈິງ, ມັນເປັນການຊົດເຊີຍສາຍພົວພັນໃນຮູບແບບໜຶ່ງໃນເກມການຄ້າໄລຍະຍາວ.